Dr Flug uf New York isch ok gsi. Chli lang aber es isch gange. Mir sin 10 Schwiizer gsi wo zämme gfloge sin. Zersch hen mer uf Frankfurt müesse fliege. Döt sin denn no öbe 45 anderii Ustuschschüeler derzue cho und denn isch es ändlich uf New York gange. Die erste 5 Täg (24.-28. August) hen mer döt e Orientation Camp vo dr Organisation. Mir hen alli zämme inere Jugendherbärg zmittst in Manhattan gläbt und jede Tag hets Sightseeingtoure gmacht. Mir sin Zobe mit ere Limousine an Times Square gfahre, sin im und uf em Rockerfeller Center gsi, bi dr Freiheitsstatue, 5th Avenue, Ground Zero,...! Und natürlich sin mer au ganz vill go shoppe...!!! =)
Usser an 1 Tag hen mir immer super Wätter gha und es isch mega warm gsi.
Am 28. August isch es denn witer zur Gastfamilie gange. Will mega vill ihri Familie in Michigan hän, sin mer 6 gsi, wo zämme nach Chicago gfloge sin und nochher no 3, wo uf Kalamazoo MI hän müesse. Also han ich nit müesse eleini fliege. Wo mir den ändlich ahcho sin, sin mer alli soo nervös gsi, dass mer froh gsi sin, dass mer nit eleini sin! Und denn isch dr Momänt cho, wo mer unseri Familie s’ersti mol richtig gseh hen. Es isch super gsi. Bi minere Gastfamilie isch dr Vater (Doug), d’Muetter (Teresa) d’Tochter (Alysen) und ihre Fründ (dr Sam) mit eme Plakat, wo druff gstande isch „Welcome Corinna“, dötte gstande und hen uf mii gwartet. Nochdem mi Gepäck cho isch sin mer heii gfahre. Uf em Wäg hen mer denn no Stopp bi irgendeme Fastfood Restaurant gmacht. Ich ha aber grad in Chicago öbis gässe und ha wäge dem nume Wasser drunke und spöter no e Glace gässe. Ich han e chlini gno, aber die isch do öbe 3 mol so gross wie in dr Schwiiz. Mini Gastfamilie het grad richtig zuegschlage. Jede het e Burger und Pommes gha (!!amerikanischi Grössene!!) und nochher no e rise Glace. Aber usser mini Muetter sin alli meeega dünn. Ich weiss würkli nit wie die das mache, will das isch nit s’letschti mol gsi, wo mer imene Fastfoodrestaurand gässe hen die letschte 3 Täg! Nochher sin mer denn ändlich ganz heii. Döte han ich no mi jüngere Gastbrueder (John), sin Kolleg (Luke) und dr Hund (Popo) kenneglernt.
S’Huus, wo ich jetzt 10 Mönet wird wohne isch nit rissig, aber gmüetlich. Ich teil mis Zimmer mit dr Alysen, was bis jetzt überhaupt nit schlimm isch, will si meeeega nätt isch und mer immer hilft, wenn ich öbis nit verstand oder so! Dr Sam wohnt mer oder weniger au no do. Er het sis eigene Zimmer usw.! Ich weiss nit, öb das do normal isch oder nur bi dere Familie.
Am 29. August hets e richtig deffdigs Zmorge gä. Bröttlete Späck, Pancakes, Rührei,...! Denn sin mer mol so schnell schnell am Nomittag an Michigansee gfahre (2,5h ei Wäg!!!). Wo ich ihne denn verzellt ha, dass mir vo Arlesheim us nume 30min bruche bis nach Dütschland oder Frankrich hen si das fascht nit chöne glaube! D’Fahrt isch mega luschtig gsi. D’Musik isch mega ufdreit gsi und alli hen mitgsunge, so isch die Ziit ganz schnell verbii gange. Uf em Heiweg hen mer denn wider mol stopp bim Mc Donald gmacht und zum Znacht hets no poulet gäh! Würkli Gmües han ich i dem Huushalt leider noni gseh und au Frücht hets erst 1mol gha.
Gester (30. August) sind dr John, Sam, d’Alysen und ich im Mc Donald go Zmorge ässe...! Spöter sin mer denn no in d’Schuel gfahre, wo mer eigentlich mini Fächer hen wölle wähle, aber die zueständig Person isch nit döte gsi, also gön mer es andersmol wider.
Ps. Föteli vo dr Familie chöme no!!!
